the interviewer interviewed .. على جانبي الطاولة

Hussein Articles

اللي كاتب البوست ده شخص قضى مرحلة من حياته في وضع معقد شوية، كنت باعمل إنترفيو لناس عشان اضمهم لفريق العمل اللي أنا مسئول عنه في الشركة اللي بشتغل فيها، وبالتزامن مع ده كان بيتعملي إنترفيو من شركات تانية عشان انضم لهم، يعني قعدت على الناحيتين، ناحية الـinterviewer وناحية الـcandidate، وبالتالي اتكونت عندي خبرة مزدوجة بخصوص عملية التوظيف بشكل عام، في السطور الجاية هاكتب خلاصة التجربة دي لعلها تكون مفيدة لحد، طبعاً دي خبرتي الشخصية ووتحليلي الشخصي للأمور، قد تكون فيه وجهات نظر تانية وخبرات أنا ماعديتش عليها، القاعدة الأولى: مفيش حد عنده الحقيقة المطلقة، القاعدة التانية: مش شرط ان كل اللي ينطبق على حد ينطبق على أي حد تاني، إقرا الكلام ده وإقرا غيره وكوّن خبرتك الشخصية حسب ظروفك وظروف مهنتك.

خلينا نبتدي بمرحلة البحث عن وظيفة:

– كنت قريت مرة مقولة أنا متفق معاها تماماً بتقول “looking for a job is a full-time job”، إعتبر “البحث عن وظيفة” هو وظيفتك الفعلية في المرحلة دي، خصص لها وقت ومجهود وتركيز كإنك بتشتغل في وظيفة فعلاً، يعني تصحى كل يوم الصبح في معاد محدد وتقعد تشتغل عدد ساعات معينة في البحث عن وظيفة، ويفضل انك تشتغل في مكان ثابت كمان عشان تكمل الإحساس بالجدية، ماتخليش الموضوع مجرد مهمة جانبية بتعملها في أوقات فراغك أو هتعملها مرة واحدة وتقعد تستنى النتيجة، لأ جهز نفسك انك هتقعد عدد ساعات معينة كل يوم تشتغل على الموضوع ده لغاية ما تلاقي الوظيفة المناسبة، بس الفكرة هنا مش مجرد قضاء عدد من الساعات وخلاص، الفكرة في وجود استراتيجية تشتغل من خلالها، بالضبط زي أي وظيفة، لو اشتغلت 10 ساعات في اليوم في الاتجاه الغلط مش هاتنتج حاجة، لكن لو اشتغلت ساعتين بس بتركيز هتحقق نتيجة، يعني الخلاصة: خصص وقت ثابت للبحث عن شغل بس ما تضيعش الوقت ده هدر.

– دوّر كويس (do your homework)، إعمل حساب في كل مواقع التوظيف المحترمة (على سبيل المثال Bayt – Monster – indeed – Naukri – CareerStructure)، إبعد عن أي موقع بيطلب منك تدفع فلوس، إنت بتلاقي وظيفة لما تبقى مؤهل مش لما تدفع فلوس، وادخل على مواقع الشركات الكبيرة في مجالك عشان في الغالب هتلاقي عندهم نظام خاص بيهم للتوظيف، معظم الشركات المحترمة هتلاقي في الموقع بتاعها لينك واضح اسمه careers، أدخل عليه وشوف الوظايف المتاحة عندهم وطريقتهم في التوظيف وسجل بياناتك عندهم، خلي بالك متاخدش الخطوة دي إلا لما يكون عندك CV كامل ومحترم (هنتكلم عن ده بالتفصيل بعد شوية) وPortfolio كويس كمان لو مهنتك محتاجة Portfolio (سابقة أعمال)، ماتضيعش فرصتك بـCV وحش أو ناقص أو مش مناسب للوظيفة لإن الشركات الكبيرة غالباً مش هتديك فرصة تانية.

– ماتزهقش وماتخليش اليأس يسيطر عليك، إنت في سوق مفتوح وفي منافسة مع ناس كتير عندهم نفس إمكانياتك وأكتر، وبالتالي الموضوع مش سهل والوظايف مش مستنياك لما تتقدم لها، البحث عن وظيفة ممكن يستمر لشهور، بس يوم ما تيأس بتبقى انسحبت من المنافسة وفقدت فرصتك وضيعت كل المجهود اللي فات، اعتبر كل محاولة فاشلة تجربة تتعلم منها، كل إنترفيو هتروحه هيضيف لك خبرة تنفعك في المرات الجاية، فيه أماكن ممكن تروحها وانت عارف انك هتترفض، ده بالضبط كإنك بتلعب ماتش ودي مع البرازيل، إنت عارف انك هتخسر بس عارف برضه انك هتتعلم وتكتسب خبرة وتكسر حاجز الرهبة من الأماكن اللي زي دي، وفي الآخر ده رزق ربنا مقدره، إنت عليك تسعى والتوفيق على ربنا.

– دوّر على اللي ناقصك وكمّله، الفترة اللي انت مش مرتبط فيها بشغل فرصة مش هتتكرر عشان تستكمل أي شهادات أو كورسات ناقصاك، شوف الوظايف المطروحة مطلوب فيها مؤهلات إيه مش موجودة عندك، العالم دلوقتي بقى فيه شهادات وaccreditation موحدة تقريباً هي اللي معتمدة عالمياً في كل مجال، حاول تاخد اللي تقدر عليه منها عشان تزود فرصتك وترفع من قيمتك المهنية.

– السيرة الذاتية (CV) هي الخطوة الأولى والأهم، لازم تعمل CV كويس، ولازم يبقى واضح ومترتب كويس، في معظم الأحيان اللي هيقراه مش هيديله أكتر من نص دقيقة (المحترفين في الموضوع ده بيقولوا ان متوسط الوقت اللي بيديه لكل CV هو 6 ثواني) وفي معظم الأحيان برضه اللي هيقراه بيبقى بيدور على حاجة معينة (keyword) هو محتاجها، وعشان كده لازم يلاقي الحاجة دي بأسهل وأسرع شكل (وده ينقلنا للنقطة اللي جاية)، بس في نفس الوقت لازم يبان شكل الCV بروفشنال ومش مبالغ فيه، مهما كانت الوظيفة اللي بتتقدم لها (حتى لو مصمم جرافكس) لازم تصميم الـCV  يبقى بسيط، فيه مواقع بتلاقي فيها فورم جاهزة للـCV وفيه مواقع بتعملك تقييم للـCV بتاعك وتقترح عليك تعديلات.

– بما إن اللي هيقرا الCV بتاعك بيدوّر على حاجة معينة، وبما إن مش كل الوظايف اللي هتتقدم لها زي بعض، يبقى كل وظيفة لها keywords معينة لازم تبان ولازم تبقى هي محور الـCV كله، وبالتالي إنت محتاج أكتر من نسخة من الـCV، فكرة الـ one-generic-CV-fits-all-positions دي تنساها تماماً، الوظائف والتخصصات دلوقتي بقت متشعبة جداً في كل المجالات، الهندسة مثلاً ييجي 50 تخصص وكل تخصص تحته 50 تخصص فرعي وكل تخصص فرعي تحته 50 مسمى وظيفي، الطبيعي ان الواحد تبقى خبرته ودراسته مناسبين لأكتر من تخصص ومسمى وظيفي، بس كل وظيفة بيبقى لها keywords مميزة ومختلفة عن التانية، فانت لما تتقدم لوظيفة محتاجة keyword X لازم تقدم CV يبان فيه keyword X دي كأهم نقطة عندك، لكن لو بتتقدم لوظيفة محتاجة keyword Y لازم تقدم CV تاني يبان فيه ان keyword Y هي اللي أهم نقطة، لو قدمت CV واحد للوظيفتين تبقى بتقلل فرصتك في الوظيفتين بشكل كبير.

– فيه شوية نصايح (dos and don’ts) مهمة جداً بخصوص الـCV، نبتدي بالحاجات اللي لازم ماتعملهاش:

1. ماتحطش صورتك وانت على البحر أو في الجيم أو سايق موتوسيكل، حط صورة رسمية (formal)، مش لازم ببدلة وكرافتة بس على الأقل ماتديش اللي هيشوف الـCV انطباع انك جاي تهرج، لو معندكش صورة تنفع يبقى ماتحطش صورة أحسن.

2. ماتستخدمش إيميل من نوعية sexy_lolo و7oda_elking والكلام ده، إعمل إيميل جديد باسم طبيعي لو معندكش إيميل باسم طبيعي، وطبعا ماتستخدمش إيميل الشغل، ما تديش انطباع انك بتستغل إمكانيات شركتك الحالية في البحث عن شغل جديد.

3. ماتحطش تفاصيل شخصية كتير، مش محتاج اعرف ان عنوانك 15أ شارع كذا خلف مصنع كذا الدور الرابع، محدش هيروحلك البيت ولا هيبعتلك جواب، كفاية تكتب مثلاً العنوان سموحة اسكندرية أو المنيل القاهرة، الهدف من العنوان (لو كان مطلوب أصلا) إني أعرف انت مقيم في مدينة إيه أو منطقة إيه وبس وده في حالة لو الوظيفة تتطلب مكان إقامة معين، برضه الديانة مش حاجة محتاج تكتبها (لو الشركة اللي بتتقدم لها هتوظفك على أساس الديانة إبعد عنها أحسن)، اسمك الرباعي مش مهم إلا لو كنت متقدم لوظيفة في أمن الدولة!، اكتب الاسم ثنائي عشان يبقى سهل في التعامل وفي الحفظ، اسم مدرستك الثانوي مش هيفرق معايا كتير إلا لو الوظيفة تشترط خريجين مدارس لغات مثلاً وده برضه مش مؤشر كويس لطريقة تفكير الشركة، لو سنك كبير مش محتاج أعرف موقفك من التجنيد، الخلاصة: إكتب المعلومة اللي هتضيف للـCV بتاعك، أي حشو من غير داعي بيقلل من قيمتك وممكن يضرك، لاحظ ان أهم موقع للـprofessional identity اللي هو LinkedIn مش بيسألك لا عن السن ولا الجنسية ولا الدين لإن المفترض في الظروف الطبيعية ان الحاجات دي ما تفرقش في ترشيحك لأي وظيفة.

4. ما تكذبش، اكتب الحقيقة بشكل لطيف بس ماتكتبش حاجة مش حقيقية.

5. ماتخليش حجم الملف كبير، معظم المواقع عندها حد أقصى لحجم الملف، ولو هتبعته بالإيميل كل ما يكون خفيف هيكون أسهل وأسرع، وماتخليش عدد الصفحات يبقى كتير (3 صفحات كحد أقصى إن مكانش صفحتين) لإن محدش هيقرا أكتر من كده.

6. نقطة مهمة جداُ، إوعى تحط أي حاجة عن حساباتك في مواقع التواصل الاجتماعي، وخصوصاً فيسبوك وتويتر وإنستاجرام وسناب تشات، أكيد فيه في الحسابات دي حاجة تتمسك عليك (تعليق، صورة، أصدقاء، رأي سياسي،…)، خلي التعامل المهني عن طريق لينكد إن وبس، وطبعاً خلي حساب لينكد إن بتاعك مهني إلى أقصى الحدود، مفيش بوستات ولا تعليقات ولا حتى لايكات خارج نطاق المهنة.

– نيجي بقى للحاجات اللي مفروض تعملها:

1. إبتدي بتعريف مختصر بنفسك وبإمكانياتك المهنية، خليه مختصر بس informative، قلل العبارات الإنشائية بقدر الإمكان وخلي مكانها معلومات وحقائق، وخلي الكلام بقدر الإمكان relevant للوظيفة اللي هتتقدم لها.

2. رتب تاريخك الوظيفي من الأحدث للأقدم، ابتدي بآخر وظيفة اشتغلتها وبعدين اللي قبلها وهكذا، اكتب المكان اللي اشتغلت فيه والمسمى الوظيفي اللي اشتغلته والفترة الزمنية ونبذة مختصرة عن الحاجات اللي حققتها في المكان ده، خلي الصيغة تعبر عن achievements مش بس responsibilities، مهم انك توضح الإنجازات والنجاحات اللي انت حققتها للمكان مش مجرد سرد المهام اللي كانت مطلوبة منك، لو عندك أرقام وحقائق تدعم كلامك يكون أحسن.

3. إكتب مؤهلاتك الدراسية وابتدي بالأحدث، الشهادات الأكاديمية الأول (ليسانس/بكالوريوس/ماجستير/دكتوراه)، إكتب اسم الشهادة بالضبط عشان بيفرق مثلاً B.Sc غير B.A غير B. Tech وهكذا (هتلاقيه في النسخة الانجليزي من شهادتك)، والجامعة أو المعهد اللي أخدت منه الدرجة العلمية وسنة الحصول عليها، وبعدين الكورسات أو الشهادات التانية ودي تبتدي فيها باللي له علاقة أكتر بالوظيفة، ماتحطش شهادات ملهاش علاقة بالوظيفة أو بالمجال، يعني لو متقدم لوظيفة مهندس ميكانيكا مهم انك تكتب انك حاصل على شهادة LEED مثلاً ويليها في الأهمية IELTS مثلاً بس مفيش داعي تكتب ان عندك شهادة في الخط العربي.

3. خلي الـCV تخدم الوظيفة اللي انت متقدم لها (وضخنا من شوية انه لازم يبقى عندك أكتر من نسخة للـCV)، شوف الوظيفة مطلوب فيها إيه واستخدم الـkeywords اللي بتخدم المطلوب ده وابرز المهارات اللي بتخدم الوظيفة دي.

4. خلي اسمك وإيميلك وتليفونك في مكان واضح (في أعلى الصفحة غالباً) وحطهم في كل صفحة، جايز أول صفحة تضيع مثلاً.

5. إكتب قائمة بالبرامج اللي بتعرف تستخدمها وابتدي بأكتر حاجة لها علاقة بالوظيفة اللي هتتقدم لها، ما تكتبش حاجات بديهية زي internet browsing أو Microsoft Office إلا لو معندكش حاجة تانية تكتبها.

6. إكتب البيانات اللي لها علاقة بالوظيفة، فيه وظايف مثلاً بيبقى مهم بالنسبة له يعرف لو عندك رخصة سواقة، حالتك الاجتماعية، مكان إقامتك، اللغات اللي بتتكلمها، لو فيه معلومة انت عارف انها مهمة للوظيفة لازم تحطها بشكل واضح.

نقطة أخيرة:

حسابك في لينكد إن LinkedIn مهم جداً وهو واجهتك للعالم المهني، إهتم بيه واستكمل كل البيانات بقدر الإمكان وخليه CV تاني لك بتفاصيل أكتر، لكن خليك حريص انه يبقى مهني فقط، ماتخليش فيه أي حاجة ماتخصش المهنة، وابني شبكة connections كبيرة (في حدود المهنة برضه) عشان هتفيدك بشكل غير مباشر، على الأقل يبقى عندك ناس ترجع لها لو احتجت حاجة تخص شركة أو وظيفة معينة.

نيجي للمرحلة التانية – الإنترفيو:

لما ربنا يوفقك وحد يتصل بيك عشان تروح مقابلة شخصية، خد بالك ان الفكرة الرئيسية في موضوع التوظيف هي ببساطة ان صاحب الشغل عنده مشكلة وبيدور لها على حل، مفيش حد بيوظف ناس جديدة إلا لو كان بيدور على حل لمشكلة معينة، خليك انت حل المشكلة دي، خليك انت الإجابة على الأسئلة اللي عنده، لو وصلت له الانطباع ده هتاخد الوظيفة وهتفرض شروطك كمان.

بالنسبة للمقابلة نفسها بقى عندي شوية نصايح:

1. إدرس المكان اللي انت رايحه كويس (تاني: do your homework)، معظم الشركات دلوقتي لها مواقع على الإنترنت أو صفحات على فيسبوك أو لينكد إن أو أي مصادر تقدر تاخد منها فكرة عامة عن الشركة دي بتعمل إيه عشان تبقى مستعد للمواضيع اللي ممكن تتفتح معاك وتقدر تربط خبرتك ودراستك بمجال شغلهم واللي هما محتاجينه، أسوء موقف ممكن تحط نفسك فيه ان الناس يحسوا انك مش فاهم هما بيشتغلوا في إيه، ممكن لينكد إن يفيدك جداً هنا، تقدر توصل لصفحة الشركة ومنها لصفحات الموظفين اللي بيشتغلوا أو كانوا بيشتغلوا فيها وتسألهم عن أي حاجة قبل ما تروح، ممكن كمان تلاقي حساب الشخص اللي هيقابلك وتقدر تاخد فكرة عن خلفيته المهنية وثقافته.

2. إدرس الوظيفة نفسها، أغلب الشركات بتبقى كاتبة job description محدد وموضحين فيه المطلوب في اللي يتقدم للوظيفة والمهام اللي هيتكلف بيها، ركز على النقط دي بالذات وماتضيعش وقت في أي مواضيع تانية حتى لو انت شايفها مهمة، لو مش مكتوبة في الـjob description تبقى مش مهمة بالنسة لهم، يعني هما بيدوروا على واحد بيعرف X وY وانت بتعرف كمان Z، ده كويس بس لو هما مش مهتمين بZ يبقى خليك في اللي هما طالبينه، الغلطة دي متكررة جداً عند حديثي التخرج، ماينفعش تقعد ربع ساعة تشرح لي الفكرة العبقرية في مشروع تخرجك لإن ببساطة أنا مش مهتم والوظيفة اللي عندي مش محتاجة أفكار عبقرية، Don’t be irrelevant.

3. روح في معادك، إعمل حساب المواصلات/الباركنج/الزحمة، إعرف العنوان بالضبط قبل ما تروح عشان ما تضيعش وقت ومجهود في التدوير عليه، إعمل حسابك توصل المكان قبل المعاد بربع ساعة مثلاً، تاخد نفسك لمدة عشر دقايق وتستعيد تركيزك بالطريقة اللي تناسبك، تقرا قرآن / تسمع مزيكا / تدخن سيجارة / تشرب حاجة، وبعدين تدخل على المكان في معادك.

4. إلبس كويس بس من غير مبالغة، المظهر مهم جداً وهو اللي بيدي الناس الانطباع الأول عنك قبل ما تقول أي كلمة، الكاجوال أوي بيقلل من قيمتك، والفورمال زيادة عن اللزوم بالنسبة للمكان بيقلل من قيمتك برضه، أقدر اقولك ببساطة إلبس العادي اللي هتلبسه لو اشتغلت في المكان ده بس لما يكون عندك ميتنج مهم مثلاً مش لما تبقى رايح/رايحة فرح، بالنسبة للبنات خليكي فورمال بقدر الإمكان، بلاش تدي انطباع ان أهم مؤهلاتك هو شكلك أو طريقة لبسك.

5. جيب معاك نسخة مطبوعة من الـCV ولو مجال شغلك محتاج Portfolio جيب معاك برضه نسخة مطبوعة منه أو على الأقل خد معاك تابلت أو iPad عشان تعرضه عليه، ماتتوقعش انك هتلاقي جهاز تعرض عليه شغلك لو واخده على فلاش ميموري في كل مكان تروحه، وماتتوقعش انك عشان بعته بالإيميل يبقوا فتحوه واتفرجوا عليه.

6. خليك على طبيعتك في الإنترفيو، لا تبالغ في التهذيب ولا تبقى وقح، لا تقعد متخشب ولا تقلبها تهريج، في الغالب اللي بيعمل معاك إنترفيو ده هو اللي هيبقى رئيسك، وعشان كده هتلاقيه بيختار الناس اللي هو يرتاح لهم على المستوى الشخصي (مع الجوانب الفنية طبعاً)، فحاول تسيب انطباع شخصي كويس، جايز جداً ده اللي يرجح كفتك عن بقية اللي اتقدموا.

7. جهز رد كويس للأسئلة التقليدية من نوع “إنت عايز تسيب شغلك ليه” أو “سبت شغلك ليه” أو “ليه المفروض أديلك الوظيفة دي”، حاول تربط كلامك بحاجة في الشركة اللي انت متقدم لها بس من غير مبالغة، وفي كل الأحوال ما تقولش حاجة وحشة عن شغلك الحالي أو السابق.

8. ماتتكلمش في الفلوس إلا لو هما اللي فتحوا الموضوع، في الغالب بيبقى فيه أكتر من إنترفيو وأكتر من مرحلة للتصفية، خلي تركيزك الأول انك تعدي من المراحل دي وتثبت كفاءتك للوظيفة عشان بعد كده تتفاوض وانت في موقف قوي، في الغالب برضه الرأي الفني بيفرض نفسه على رأي الـHR، يعني لو اللي عمل معاك إنترفيو شاف انك مناسب للوظيفة هيضغط على الشركة عشان يوظفوك وبالتالي هيتساهلوا معاك شوية في الفلوس، المهم انك تسيب انطباع كويس، بشكل عام الـinterviewers نوعين أساسيين، نوع بيدور على الأكفأ ونوع بيدور على الأرخص، اللي بيدور على الكفاءة مش هيخسر واحد كفؤ عشان الفلوس، واللي بيدور على الرخص ده إبعد عنه خالص.

9. ما تطمعش، وفي نفس الوقت ما تبخسش نفسك، إدرس المكان اللي انت رايحه وحدد لنفسك رقم معين تطلبه وما تتنازلش عن الرقم ده إلا في حدود معقولة، بس في كل الحالات لازم تبقى محدد رقم، والرقم ده ممكن يختلف حسب المكان بس يكون متناسب مع إمكانياتك وخبرتك، ما تطلبش رقم انت عارف انك ما تستحقهوش على أمل انها تضرب معاك ويوافقوا، دي مش لعبة قمار، وفي نفس الوقت ما تطلبش رقم قليل أوي على أمل انك تغريهم عشان بعد كده هتحس انك ظلمت نفسك ومش هتقدر تتكلم، طبيعي ان فيه شركات مرتباتها أعلى من شركات تانية لنفس الوظايف، عشان كده لازم تعرف ولو بتقديرك الشخصي متوسط المرتبات في المكان اللي انت رايحه عشان ماتطلبش رقم أعلى بكتير أو أقل بكتير من اللي هما حاطينه للوظيفة، في الحالتين بتقلل فرصتك.

10. نقطة غريبة شوية بس حصلت معايا مرتين فحبيت اقولها، البنات ياريت ماتجيبش حد معاها (أخوها/خطيبها/أبوها) في الإنترفيو، لو من أولها هتدي انطباع انك محتاجة حد معاكي يبقى هعتمد عليكي في الشغل ازاي؟!

11. ما تسرحش بأحلامك وماتتعشمش أوي، إحلم وخليك طموح بس خلي رجليك دايماً على الأرض، مش معنى ان الناس قابلوك كويس أو حسيت انك سبت انطباع إيجابي يبقى خلاص هتشتغل، حتى لو اللي بيعملك المقابلة قالك انه وافق عليك ماتاخدش أي خطوة غير لما يوصلك عرض رسمي، أي حاجة قبل المرحلة دي لا تعني أي شيء، بمجرد خروجك من المقابلة إنسى الموضوع وفكر في المكان اللي بعده لغاية ما هما يتصلوا بيك، ما تتصلش انت لإن هما لو عايزينك مش هيستنوك تتصل.

 خلاصة الموضوع:

إبذل مجهود وخد الموضوع بجدية وخليك دايماً professional في كل الخطوات حتى لو الطرف التاني مش كده، استكمل أي حاجة ناقصاك وخليك صبور لأقصى الحدود وخلي عندك ثقة في الله، في حالات كتير جداً الوظيفة بتيجي من طريق بعيد خالص عن الطرق اللي بتدور فيها وأحياناً بالصدفة البحتة، ده مش معناه انك تقعد تستنى صدفة، ده معناه انك تعمل اللي عليك وتستنى توفيق ربنا.

815 Total Views 3 Views Today
Husseinthe interviewer interviewed .. على جانبي الطاولة